Главные новости Денисовского района – Qostanai Media

Оның жастарға тәрбиелік мәні зор

Жақында Затобол кентіндегі Нұржан Наушабаев атындағы қазақ мектеп-гимназиясының бірінші қабатында ақын, көрнекті өнер майталманы Нұржан Наушабаевқа бюст қойылды.

Осы арада айтулы тұлғаның өткен ғұмырына да қысқаша тоқталып өткен артық болмайтын секілді. Кезінде осы өңіріміздің атын шығарған бабамыздың есімі көптеген дүниеге келген ұл балаларға қойылғаны да белгілі.

Бұл да болса, қандастарымыздың оған деген ерекше құрметінің белгісі іспетті. Көзі қарақты оқырман оның Қазақстан Жазушылар Одағының мүшесі, Халықаралық «Алаш» сыйлығының лауреаты, ақын, ғалым, драматург Ақылбек Шаяхметтің қолдауымен бірнеше кітаптары жарық көргенін де жақсы білсе керек.

Нұржан Наушабаев 1858 жылы қазіргі Қостанай облысы Алтынсарин ауданында дүниеге келген. Ол ақын, діни-ағартушылық бағыттың көрнекті өкілі. Анасы Қадишадан (Шал ақынның қызы) жастайынан айырылып, нағашыларының қолында тәрбиеленді.

Троицк қаласында З.Расулов медресесінде білім алды. Жастайынан араб-парсы тілдеріндегі еңбектері мен татар, башқұрт жазушыларының шығармаларын оқыды.
Өсе келе әнші, сері, балуан атанып, дидактик үлгідегі нақыл, терме, толғау, мысал және назым, ғақлия жырларын жазды.

Даңқты жерлесіміздің 40 шақты өлеңі мен айтыстары жұртшылықтың күні бүгінге дейін жадында. Мысалы, «Жұмбақ. Нұржан мен Сапарғалидың жұмбақ айтысы» (1903), “Манзұмат қазақия” (1903), “Алаш” (1910) атты жинақтары Қазан қаласында басылғаны көпшілікке белгілі.

Оның өлеңдерінің негізгі тақырыбы – өнер-білім мен адамгершілік жайында. Ол өзінің жүрген жерінде осы игі қасиеттерді насихаттады.

Жоғарыда аталған білім ордасында орнатылған бюстке ақынның туысы, кәсіпкер Әділ Саматов демеушілік етті. Бұл мектеп-гимназия өміріндегі елеулі оқиға болып табылады.

Әлгі бюсттің ашылу салтанатында елімізге белгілі ақын-жазушылар Ғұмар Ахметчин, Ақылбек Шаяхмет, Нағашыбай Мұқатов, Әсия Беркеновалар сөз алып, Нұржан Наушабаев жайлы жан-жақты әңгімеледі.

Сондай-ақ Қостанай қаласының өнерлі жастары әуелете ән шырқап, күмбірлете күй шертті.

Осынау білім ордасының директоры Айткүл Әлімованың айтуына қарағанда, ақын бабамызға қойылған бюсттің мектеп оқушылары үшін берер өнегесі мол.

Оқушылар көрнекті тұлғаның халыққа сіңірген еңбегін ешқашан ұмытпай үнемі естерінде сақтайтын болады.

Салтанатты жиыннан кейін жиналған қауымға Қостанай шаһарындағы «Сәтті» шатханасында дастархан жайылды. Онда бабамыздың рухына бағышталып, Құран оқылды.

Аягөз Кәкімжанова