Денисов ауданында шөп шабу науқаны аяқталуға таяды

 Денисов даласы дәл қазіргі уақытта құмырсқаның илеуіндей қызу тірлікке кіріскен.Барлығы жүз шаруа қожалығы шабындыққа орақ салды. Науқандық жұмысқа 300-ден астам техника жұмылдырылды. Соның ішінде трактор, прицепт және шөп бұрғыш бар. Бүгінде ауылдық округтердің шаруалары 51 мыңнан астам гектар шөп шапқан. Қысқа сақтау қорына 40,5 мың тонна жем-шөп жеткізілді. Бұл дегеніміз қажетті мал азығының 82,2 %-і дайын дегенді білдіреді. Соның ішінде 16,8 тоннасы ауыл шаруашылық тауар өндірушілерінің қажетіне, 18,2 тоннасы тұрғындардың ауласына түсірілді. Негізінде, аудан халқына 47 мың тонна жем-шөп қажет.

Аудандық кәсіпкерлік және ауыл шаруашылық бөлімінің басшысы Владислав Рагуляның айтуынша, былтыр шөп бағасы еркін саудада 20-25 мыңнан саудаланыпты. Кәсіпорын жұмысшыларына 15 мыңнан және зейнеткерлерге де дәл сол бағада ұсынылған.

Биыл шөптің шығымы жоғары. Орташа өнімділікке тоқталсақ, әр гектарынан 8,3 центнер көлемінде шөп шабылуда. Ал былтыр 7-8 центнердің айналасында болған. Бүгінде жергілікті шаруалардың алды науқанды табысты аяқтап, қаһарлы қысқа тастүйін дайын отыр. Қалған жұмысты шілде айының соңына қарай аяқтамақ.

Қымбат ДОСЖАНОВА

Суретті жолдаған «Ольшанское» ЖШС ұжымы.